आपण एक जुनी ब्राउझर आवृत्ती वापरत आहात. कृपया सर्वोत्तम MSN अनुभवासाठी एक समर्थित आवृत्ती वापरा.

खेळपट्टीची मागणी? छे, ते काय असते...

महाराष्ट्र टाइम्स लोगो महाराष्ट्र टाइम्स 09-10-2019
© Times Internet Limited द्वारे प्रदान केलेले

म. टा. क्रीडा प्रतिनिधी, पुणे

'संघाला पूरक खेळपट्टीची मागणी? छे, ते काय असते? आम्हाला त्याची आवश्यकता नाही. खेळपट्टी कशी ही असो, आमचे गोलंदाज कामगिरी करतातच' भारतीय क्रिकेट संघाचे गोलंदाजी प्रशिक्षक भरत अरूण सांगत असतात. त्यांच्या आवाजातील आत्मविश्वास गगनाला भिडलेला असतो; कारण विशाखापट्टणम कसोटीत स्पिनर्सना पोषक असलेल्या खेळपट्टीवर शमीने खोऱ्याने विकेट काढल्या. अश्विनने विकेट घेतल्या; पण त्यावेळी खेळपट्टी फलंदाजांवर मेहरबान होती. यामुळेच मंगळवारी पुण्यात पत्रकारांशी संवाद साधताना भारतीय संघाच्या गोलंदाजांचे गुरूजी 'फॉर्मात' होते.

'यजमान आहोत; म्हणून अमुक अशापद्धतीची खेळपट्टीच तयार करा, असे फर्मान आम्ही कधीच सोडत नाही. जागतिक क्रिकेटमध्ये अव्वल व्हायचे असेल तर खेळपट्टी कशी आहे? असा प्रश्नच गोलंदाजाला पडता कामा नये. त्याऐवजी समोर आहे त्या खेळपट्टीवर सर्वोत्तम मारा कसा करता येईल? असा विचार गोलंदाजाच्या मनात हवा. जगातील कोणत्याही खेळपट्टीवर टिच्चून मारा करता यायला हवा अन् आव्हानात्मक खेळपट्टीवर जिंकता आले पाहिजे', असे अरूण नमूद करतात.

गांधी-मंडेला कसोटी मालिकेतील दुसऱ्या पुणे कसोटीला १० ऑक्टोबरपासून गहुंज्यातील महाराष्ट्र क्रिकेट असोसिएशन स्टेडियममध्ये सुरुवात होते आहे. विशाखापट्टणमला झालेल्या मालिकेतील पहिल्या सामन्यात रविवारी यजमान भारताने दक्षिण आफ्रिकेला २०३ धावांनी पराभूत केले. त्यानंतर, सोमवारी दोन्ही संघ पुण्यात दाखल झाले. भारतीय संघ सहाजिकच दुसरा सामना जिंकून तीन सामन्यांच्या मालिकेत २-० अशी विजयी आघाडी घेण्यासाठी उत्सुक आहे, तर दुसरीकडे दक्षिण आफ्रिका संघ मालिकेत बरोबरी साधण्यासाठी उत्सुक आहे. मंगळवारी दोन्ही संघांनी सराव केला.

या स्टेडियममध्ये यापूर्वी भारत-ऑस्ट्रेलिया यांच्यात कसोटी सामना झाला होता. अडीच दिवसांतच ऑस्ट्रेलियाने भारताला हरविले होते. त्यावेळी येथील खेळपट्टीवर टीका झाली होती. त्यामुळे खेळपट्टी आता या कसोटीदरम्यानही खेळपट्टी कशी असणार, याबाबत औत्सक्य आहे. भारत अरुण म्हणाले, 'एक चांगला 'नंबर वन' संघ म्हणून कोणतीही परिस्थिती तुमच्या समोर येवो, तुम्हाला ती स्विकारावी लागते आणि सामोरे जावे लागते. आम्ही परदेशातही खेळतो, तेव्हा आम्ही खेळपट्टीकडे 'होम कंडिशन' म्हणूनच पाहतो. दोन्ही संघांसाठी खेळपट्टी सारखीच असते. खेळपट्टी कशी आहे, हे पाहण्यापेक्षा आम्ही आमच्या गोलंदाजीवर काम करतो.'

भारत अरुण म्हणाले, 'गेल्या दोन वर्षांत भारतीय वेगवान गोलंदाजांनी मायदेशात आणि परदेशातही चांगली कामगिरी केली आहे. भारतीय खेळपट्ट्या अनेकदा फिरकीला पुरक असतात; तसेच रिव्हर्स स्विंगलाही अनुकूल असतात. त्या वेळी आपले गोलंदाज अधिक यशस्वी होतात. कारण, भारतीय गोलंदाज रिव्हर्स स्विंग करण्यात माहीर आहेत.'

'रिव्हर्स स्विंग' ही देशांतर्गत क्रिकेटची देणगी असल्याचे सांगत भारत अरुण म्हणाले, 'देशांतर्गत क्रिकेटमध्ये आपल्याकडे अनेकदा पाटा खेळपट्ट्या पाहायला मिळतात. काही वेळा तर 'आउट फिल्ड'ही एवढे चांगले नसते. अशा वेळी गोलंदाजाला यश मिळविण्यासाठी चेंडू 'रिव्हर्स' करण्याचे कौशल्य शिकावे लागते. यातूनच आपले गोलंदाज 'रिव्हर्स स्विंग'मध्ये माहीर झाले आहेत.'

'बुमराह, शमी हे छोटे-छोटे 'स्पेल' टाकतात, तर इशांत दीर्घ स्पेल टाकतो. आपण केव्हा अधिक प्रभावी ठरू शकतो, याबाबत गोलंदाज हे अधिक सजग झाले आहेत,' असे सांगत भारत अरुण म्हणाले, 'गेल्या सामन्यात म्हणावा असा 'रिव्हर्स स्विंग' पाहायला मिळाला नाही. अशा वेळी अचूक टप्पा आणि योग्य 'लाइन' महत्त्वाची असते. तुम्हाला परिस्थितीशी जुळवून घ्यावे लागते. जेवढ्या लवकर गोलंदाज परिस्थितीशी जुळवून घेतो. तेवढ्या लवकर तो यशस्वी ठरतो, हे आपण महंमद शमीच्या यशात पाहिले. त्याने 'स्टम्प लाइन'मध्ये गोलंदाजी केली आणि त्याने पाच विकेट घेतल्या. त्यातील चार जणांचा त्याने त्रिफळा उडविला.'

गेल्या सामन्यातील शमीच्या भन्नाट गोलंदाजीबाबत भारत अरुण म्हणाले, 'विजयासाठी आम्हाला खूप मेहनत घ्यावी लागणार, याची जाण आम्हाला होती. अशा खेळपट्टीवर भागीदाऱ्या होणार, हे आम्हाला माहीत होते. अशा वेळी संयम महत्त्वाचा होता. अशा वेळी शमीचा तो भन्नाट 'स्पेल' महत्त्वाचा ठरला. त्यामुळे आम्ही सामन्यात परतलो. परिस्थिती खूप अवघड होती.'

\B'आव्हाने आवडते'\B

भारतीय संघाने कसोटी क्रिकेट मालिकेमध्ये पहिल्या सामन्यातील वरचढ खेळामुळे पाहुण्या दक्षिण आफ्रिका संघासमोर आव्हान उभे केले आहे. मात्र, या आव्हानासाठी दक्षिण आफ्रिकेचा संघ सज्ज असून, मला अशी आव्हाने स्वीकारायला आवडतात, असे मत आफ्रिकेचा अष्टपैलू खेळाडू सेनुरन मुथूस्वामीने मंगळवारी व्यक्त केले. मालिकेतील पहिल्या सामन्याद्वारे मुथुस्वामीने कसोटी क्रिकेटमध्ये पदार्पण करताना पहिल्या व दुसऱ्या डावात अनुक्रमे ३३ व ४९ धावांची खेळी केली. त्याचबरोबर, त्याने भारताचा कर्णधार विराट कोहलीची महत्त्वपूर्ण विकेटही मिळवली. 'आम्ही संघ म्हणून 'कम्फर्ट झोन'च्या बाहेर येत असून, अधिक दर्जेदार कामगिरीसाठी प्रयत्न करत आहोत. पहिल्या सामन्यात माझी कामगिरी संघाचा पराभव टाळू शकली नाही. दुसऱ्या सामन्यात अधिक चांगली कामगिरी करण्याचा माझा प्रयत्न असेल,' असे मुथूस्वामीने सांगितले.

\B'खेळपट्टी फिरकीस पूरक'\B

गहुंजे येथील एमसीए स्टेडियमवर खेळवण्यात येणाऱ्या भारत-दक्षिण आफ्रिका कसोटी क्रिकेट मालिकेतील दुसरा सामन्यासाठी खेळपट्टी फिरकी गोलंदाजीस पूरक असावी,' असा अंदाज दक्षिण आफ्रिकेचा कर्णधार फाफ डुप्लेसिसने व्यक्त केला आहे. मला भारतीय वातावरण आणि खेळपट्टीची चांगली माहिती आहे. या ठिकाणची खेळपट्टी थोडी अधिक लाल आहे आणि सामान्यत: अशा खेळपट्टीवर चेंडू अधिक 'स्पिन' होतो. त्यामुळे पहिल्या कसोटीच्या तुलनेत दुसऱ्या कसोटीत फिरकी गोलंदाजीस अधिक वाव असेल, असे डुप्लेसिस म्हणाला. येथील वातावरण उष्ण आहे आणि या वातावरणाशी जुळवून घेण्यासाठी आम्ही आज पुरेसा वेळ मैदानावर सराव केला. मागील कसोटीतील पराभवामुळे आमचा संघ विचलित झाला नसून, नव्या मानसिकतेसह आम्ही दुसऱ्या कसोटीमध्ये उतरणार आहोत, असेही डुप्लेसिसने सांगितले.

More from Maharashtra Times

महाराष्ट्र टाइम्स
महाराष्ट्र टाइम्स
image beaconimage beaconimage beacon