आपण एक जुनी ब्राउझर आवृत्ती वापरत आहात. कृपया सर्वोत्तम MSN अनुभवासाठी एक समर्थित आवृत्ती वापरा.

भारताची द. आफ्रिकेवर मात; मितालीचा 'विक्रम'

महाराष्ट्र टाइम्स लोगो महाराष्ट्र टाइम्स 09-10-2019
© Times Internet Limited द्वारे प्रदान केलेले

नवी दिल्लीः

भारतीय महिला क्रिकेट संघाने आज झालेल्या वन डे सामन्यात दक्षिण आफ्रिकेच्या संघावर ८ गडी राखून मात केली. या विजयासोबतच भारतीय संघाने मालिकेत १-० अशी आघाडी घेतली आहे. प्रिया पुनिया (७५ धावा), जेमिमा रोड्रिग्स (५५ धावा) या दोघींच्या फलंदाजीच्या जोरावर भारतीय महिला संघाने आज झालेल्या पहिल्या वन डे सामन्यात दक्षिण आफ्रिकेचा ८ गडी राखून पराभव केला. या विजयासोबतच भारतीय संघाने तीन वन डे सामन्यांच्या मालिकेत १-० अशी आघाडी घेतली आहे.

सामन्यात जबरदस्त खेळ करणारी प्रिया पुनिया ही 'मॅन ऑफ द मॅच' ठरली

बडोदा येथे खेळल्या गेलेल्या आजच्या वन डे सामन्यात टॉस जिंकून प्रथम फलंदाजी करणाऱ्या दक्षिण आफ्रिकेच्या संघाला ४५.१ षटकात १६४ धावा करता आल्या. आफ्रिकेच्या संघाला पूर्ण ५० षटके खेळता आली नाही. त्यांचा संघ ४५ षटकातच सर्व बाद झाला. भारतीय संघाला मिळालेले १६५ धावांचे आव्हान भारतीय फलंदाजांनी पूर्ण केले. भारतीय संघाने हे आव्हान ४१.४ षटकात पूर्ण करीत आफ्रिका संघाचा दणदणीत पराभव केला.

भारतीय फलंदाजासोबतच गोलंदाजांचीही कामगिरी चांगली राहिली. भारतीय संघाकडून झूलन गोस्वामीने तीन, शिखा पांडेय, पूनम यादव आणि एकता विष्ट यांनी प्रत्येकी २-२ गडी बाद केले.

मिताली राजने रचला इतिहास

भारताची दिग्गज महिला क्रिकेटपटू मिताली राजने आज बुधवारी इतिहास रचला. दक्षिण आफ्रिकेविरुद्ध पहिला वन डे सामना खेळण्यासाठी मिताली राज मैदानात उतरताच हा विक्रम तिच्या नावावर झाला. वन डे करिअरमध्ये तब्बल २० वर्ष पूर्ण करण्याचा विक्रम मिताली राजने केला आहे. सचिन तेंडुलकरच्या नंतर असा विक्रम करणारी मिताली ही भारताची दुसरी खेळाडू बनली आहे. तर जागतिक क्रमवारीत ती चौथ्या क्रमांकावर पोहचली आहे.

सर्वात जास्त वन डे सामने खेळण्याच्या यादीत सचिन तेंडुलकर पहिला आहे. सचिन तेंडुलकरचे वन डे करियर २२ वर्ष १९ दिवस इतके आहे. सचिनने डिसेंबर १९८९ साली वन डे क्रिकेटमध्ये पदार्पण केले होते. तसेच मार्च २०१२ साली वन डे क्रिकेटमधून निवृत्ती जाहीर केली होती. मिताली राजने २६ जून १९९९ साली आयर्लंडविरुद्ध वन डे क्रिकेटमध्ये पदार्पण केले असून ती अद्याप खेळत आहे.

मितालीच्या नावावर आता २० वर्ष १०५ दिवस वन डे करिअरची नोंद आहे. तिनं आतापर्यंत २०४ वन डे सामने खेळले आहेत. तसेच ६ हजारांहून अधिक धावा केल्या आहेत.

More from Maharashtra Times

महाराष्ट्र टाइम्स
महाराष्ट्र टाइम्स
image beaconimage beaconimage beacon