您使用的是較舊的瀏覽器版本。若要獲得最佳 MSN 體驗,請使用支援的版本

全港12大好食車仔麵小店晒冷

NM+ 新Monday 標誌 NM+ 新Monday 6/9/2017 LIFESTYLE

車仔麵是經典港式平民美食。藏身街頭巷尾,靈活多變,一撮油麵、十幾廿款餸任意挑選、再加兩殼熱湯、淋匙辣汁,就是一碗庶民Comfort food。功夫多,利潤低,要做得好食並不容易。究竟邊到有 好食車仔麵 ?今次就挑選以下12間各有名氣、歷史的必食車仔麵店,向這道本土美食致敬!

text-Ruby  photo-Hong、Mark、KwanYiu、Meck、新傳媒資料室  source-新假期

好食車仔麵 即睇12間

1. 車仔麵之家 上癮生炒咖喱魷

六十多年前街邊檔起家,除了捧著麵立食吃的特色,咖喱魷魚最馳名。每朝在廚房把阿根廷乾魷、自家製咖喱醬生炒爆香,濃濃咖喱香味湧出店外,魷魚炒得夠辣又入味。

十九款餸料全部都是傳統經典選擇,酸齋外脆內軟;牛腩口感軟滑,五香味濃。湯底每日以雞骨、豬骨熬煮,又定時加新骨來熬,愈熬愈濃。麵條食落軟硬度剛好,加一兩匙招牌咖喱辣醬,錦上添花。

好食車仔麵1 © 由 NM+ 新Monday 提供 好食車仔麵1

餸料每款$6-$10,粉麵$8-$16

好食車仔麵2 © 由 NM+ 新Monday 提供 好食車仔麵2

魷魚口感彈牙,有鮮味,咖喱微辣,餘韻有香料清香。

好食車仔麵3 © 由 NM+ 新Monday 提供 好食車仔麵3

招牌咖喱魷魚每日炒兩次,通常3pm前沽清

好食車仔麵4 © 由 NM+ 新Monday 提供 好食車仔麵4

午飯時間,人龍排到入後巷,更有人企後巷食麵。

車仔麵之家

地址:灣仔晏頓街1號A舖(顯示地圖)

電話:2529 6313

營業時間:7:00am-6:00pm(星期日休息)

2. 肥哥車仔麵 刺激爆炒辣汁

店子鄰近文青熱點JCCAC,老闆肥哥賣麵三十多年,由推車仔做到入舖。湯底以豬骨熬湯,還加入大量冬菇椗,使湯味更見鮮甜。辣汁更有四種辣度,以大量新鮮指天椒、乾椒、指天椒粉煮成,更會手切新鮮青紅小辣椒加料,平日吃慣譚仔中辣的小編,試一匙小辣,已經標汗!車仔餸有坊間少見鮮牛肉,口感嫩滑;更有原個雪耳,索晒湯汁好特別,亦堅持要做到嗱喳麵不嗱喳,豬皮用火輕燒,再人手箝出細毛,好講究。

好食車仔麵5 © 由 NM+ 新Monday 提供 好食車仔麵5

餸料每款$7-$12,粉麵$7-$10

好食車仔麵6 © 由 NM+ 新Monday 提供 好食車仔麵6

腐乳通菜 $15 腐乳自家以辣油、蒜粒、辣椒粒腐乳調配,特別惹味。

好食車仔麵7 © 由 NM+ 新Monday 提供 好食車仔麵7

Graffiti招牌,讓人老遠都見到,很搶眼。

好食車仔麵8 © 由 NM+ 新Monday 提供 好食車仔麵8

一近黃昏開始多人,好多熟客到來聚腳,人多時會在店外放四、五張摺枱。

肥哥車仔麵

地址:石硤尾白田偉智街38號福田大廈地下55號

電話:2777 3089

營業時間:8:00am-7:30pm(星期一至五)、8:00am-7:00pm(星期六)(星期日休息)

3. 華記小食店 王子創意車仔餸

隱藏在青衣涌美老屋村,店主自稱「車仔麵王子」。其實上世紀60年代,王子的爸爸已在青衣大街賣麵,後來父親病逝,王子二話不說回家接手,傳統餸料跟足舊時做法,同時藉著外遊的見識,將新元素滲入車仔餸中。

三十多款餸,有傳統豬紅、蘿蔔、豬皮;創意也有炸雲吞,鯪魚肉加入粟米、麥皮,口感豐富;煙燻雞翼以綠茶燻香,用黑糖調味,煙燻味清香,肉質嫩滑。還有昆布汁鮮吊桶、自家磨豆花等隱藏菜式,不過只供應給熟客,能否吃到就要講緣份。

好食車仔麵9 © 由 NM+ 新Monday 提供 好食車仔麵9

餸料每款$3-$15,粉麵$6-$9

好食車仔麵10 © 由 NM+ 新Monday 提供 好食車仔麵10

雞肉充滿茶香和燻香,再加黑糖汁,帶微甜。

好食車仔麵11 © 由 NM+ 新Monday 提供 好食車仔麵11

炸雲吞口感爽彈,味道有魚香之餘,還有粟米香甜

好食車仔麵12 © 由 NM+ 新Monday 提供 好食車仔麵12

寸勁豬頸肉 $48-68(視乎大小) 堅持不用鬆肉粉,用拳頭打鬆肉質。灑上原粒孜然,用火槍燒香,香味滿溢。

好食車仔麵13 © 由 NM+ 新Monday 提供 好食車仔麵13

坐在戶外食車仔麵,份外有風味。

華記小食店

地址:青衣涌美老屋村90號地下

電話:2436 0710

營業時間:7:00am-3:00pm(星期二至日)

4.永年士多 回甘藥材湯

元朗地標,五十多年歷史,由士多雜貨到賣腸粉魚蛋車仔麵。食物由屯門中央工場製作,成品運來店中再翻熱、調味。最近新開尖沙咀店,經常出現人龍,名氣持續。

湯底用了廿斤豬骨、老雞熬製,還有果皮、當歸、甘草等材料,令湯底多了一股藥材的甘甜,頗獨特。傳統餸料水準中上,大腸半肥瘦,豬皮乾淨無沙,豬紅軟熟入味帶蒜香;更有流心蛋,蛋汁濃稠有蛋香,值得一讚。

好食車仔麵14 © 由 NM+ 新Monday 提供 好食車仔麵14

餸料每款$8,粉麵$8

好食車仔麵15 © 由 NM+ 新Monday 提供 好食車仔麵15

紅豆奶茶、柚子檸水 $22 紅豆香甜,配厚滑奶茶,是紅豆冰變奏。微酸柚子蜜加上檸汁,味道清新。

好食車仔麵16 © 由 NM+ 新Monday 提供 好食車仔麵16

新裝修後換上長木枱,鐵凳的工業風,感覺時尚。

好食車仔麵17 © 由 NM+ 新Monday 提供 好食車仔麵17

安排至少八個員工負責車仔餸櫃,好有效率。

好食車仔麵18 © 由 NM+ 新Monday 提供 好食車仔麵18

一到假日,人龍長到圍住整間店,起碼排廿分鐘。

永年士多

地址:元朗教育路88號寶城洋樓2-4號

電話:2477 3816

營業時間:12:00nn-10:00pm

地址:尖沙咀加拿芬道46號地下7-8號舖

營業時間:12:00nn-10:30pm

5.麵麵店 50款車仔餸列陣

給人最深印象是老闆小儀,但其實麵店早在98年於佐敦開業,後因業主加租,後來得小儀出手入股,得以繼續經營。

單說麵類就有十款,連讚岐烏冬、檬粉、粉絲都有。餸料近五十款,新派選擇有麻辣蓮藕、沙葛餃、魚肉春卷等。特調麻辣汁掛在爽口蓮藕片,香麻中隱約有蓮藕的清新。豬骨清湯底可加辣汁、咖喱汁,還有獨家薑酒湯,加玫瑰露煮,薑味清香。

好食車仔麵19 © 由 NM+ 新Monday 提供 好食車仔麵19

餸料每款$8-$12,粉麵$14-$17

好食車仔麵20 © 由 NM+ 新Monday 提供 好食車仔麵20

麻辣蓮藕是餐廳招牌菜,麻辣汁小麻多辣。

好食車仔麵21 © 由 NM+ 新Monday 提供 好食車仔麵21

原木長枱、木板凳,裝修別於傳統車仔麵店。

好食車仔麵22 © 由 NM+ 新Monday 提供 好食車仔麵22

黑色大門,大玻璃窗,很有新派麵店的感覺。

麵麵店

地址:佐敦廟街274號

電話:2375 3300

營業時間:10:00am-10:00pm

6.新記車仔麵 靈魂辣汁吸擁躉

其實擁躉一向多,其靈魂之辣汁是招牌,據說是老闆每晚凌晨兩點,邊炒邊撈的成果。辣汁質地濃稠,帶點微微嗆喉,啱辣迷。

豬骨湯底熬至少兩小時,出奇地有回甘。車仔餸平均水準中上,滷水雞翼尖、豬腸入味軟腍,炸魚皮入口脆卜卜。定價相比其他店高,坊間每款餸最低$7,這裡就$10,份量卻比正常少四分一。

好食車仔麵23 © 由 NM+ 新Monday 提供 好食車仔麵23

餸料每款$10,粉麵$10

好食車仔麵24 © 由 NM+ 新Monday 提供 好食車仔麵24

雞翼尖色澤褐紅,賣相得!

好食車仔麵25 © 由 NM+ 新Monday 提供 好食車仔麵25

擁躉眾多,由朝到晚迫滿人。

新記車仔麵

地址:銅鑼灣登龍街49號地下B舖(顯示地圖)

電話:2573 5438

營業時間:12:00nn-11:30pm

7.榮安小食 米芝蓮街頭美食推介

2015入選米芝蓮十大香港街頭美食。店內員工至少半百,發黃的牆身、銀色筷子筒,有人覺得懷舊、有人覺得邋遢。30多年前由舊式士多起家,自家製滷水雞翼最熱賣,後轉型車仔麵,成荃灣地膽至愛。滷水汁香味出眾,餸料如大腸、雞翼尖、豆腐都香得有層次。不過環境較細,來吃要排隊,落單、取麵、飲品都要自己拎。

好食車仔麵26 © 由 NM+ 新Monday 提供 好食車仔麵26

餸料每款$5-$8,粉麵$5

榮安小食

地址:荃灣大河道24號B地下

電話:2492 6300

營業時間:11:00am-12:00mn

8.榮記粉麵 遊客人龍店

銅鑼灣無人不識的名店,門前人龍不絕,連遊客都識搵上門。蘿蔔、豬紅、魚蛋水準正常,主打雞翼尖算滑;辣油鮮紅、微香,湯底帶甜,至讚是大部分時間會免費送幾棵時菜配麵。不過車仔麵最多只可點五餸,樓面阿姨解釋,是因麵碗太細……不太Flexible。

好食車仔麵28 © 由 NM+ 新Monday 提供 好食車仔麵28

單拼/雙拼 $33,三拼$39,四拼$45,五拼$51

榮記粉麵

地址:銅鑼灣糖街27號A地下

電話:2808 2877

營業時間:11:30am-10:00pm

9.文記車仔麵 每日不同餸料

相比其餘9間店,文記年資算短,開業五年。身處麵食名店雲集的深水埗,卻經常滿座。車仔餸選擇超多,每日近五十款,必點香脆豬油渣,一咬甘香豬油滲出;更有上湯柚皮、辣味螺肉、陳皮魚蛋等經典餸。不過水準飄忽,同一個阿姐剪餸,柚皮時厚時薄,影響口感,豬腸亦切得時大時細,較為隨意。

好食車仔麵29 © 由 NM+ 新Monday 提供 好食車仔麵29

餸料每款$8-$12,粉麵$7-$8

文記車仔麵

地址:深水埗福榮街121號地下

電話:9059 5104

營業時間:24小時

10.九記牛什粉麵 牛雜選擇最多

開在鵝頸橋街巿熟食中心,白領至愛,午巿必現人龍。牛雜款式選擇最多,牛腸、牛膀、草肚、金錢肚、牛沙瓜,說得出都有。老闆九仔每朝六、七點入手新鮮牛雜,花大量功夫處理,招牌牛腸,重複清洗裡裡外外,揤走肥膏。同場也有手打鯪魚餅,彈牙,魚味鮮濃。

好食車仔麵30 © 由 NM+ 新Monday 提供 好食車仔麵30

餸料每款$7,粉麵$6

九記牛什粉麵

地址:灣仔鵝頸橋街市熟食中心8號檔

電話:2988 8960

營業時間:7:00am-5:00pm

11.太安樓林記 自家咖喱汁

太安樓內的熱門車仔麵店,最正是門口設開放式車仔檔,連Viu TV電視劇《瑪嘉烈與大衛》都去取景。四十年歷史,家庭式作業,媽媽執餸、阿仔輔助,一碗四餸麵大約三十五蚊,份量好足。餸料中規中矩,自家調製咖喱汁、辣汁味道層次反而豐富惹味。堂食都以發泡膠碗上,不夠環保。

好食車仔麵31 © 由 NM+ 新Monday 提供 好食車仔麵31

兩餸$24,三餸$30,四餸$36 (另加每餸$6-$10)

太安樓林記

地址:西灣河筲箕灣道57-87號太安樓地下A34A舖

電話:從缺

營業時間:12:00nn-3:00am

12.車品品 個性老闆台式風味

性格小店,只做晚市,星期一及紅日又休息,開門不準時,通通講老闆心情,小編去食都試過摸門釘。不過粉絲眾多,不時有食客排隊等開門,上菜速度極慢,柯打後等半小時才有得吃。餸菜限量製作,走台風,魯肉餃、滷水蛋(鐵蛋),連滷豬腸都是帶甜的台式風味。

好食車仔麵32 © 由 NM+ 新Monday 提供 好食車仔麵32

另魯肉餃4隻$29,餸料每款$9-17,粉麵$12-25

車品品

地址:大角咀埃華街92號

電話:2180 9655

營業時間:2:00pm-4:00pm、6:30pm-11:30pm(星期二至五 )、2:00pm-5:00pm、7:00pm-11:30pm (星期六及日)

(星期一及公眾假期休息)

>>> LIKE我們fb

www.facebook.com/newmonday.com.hk

更多 NM+ 新Monday 的內容

image beaconimage beaconimage beacon