您使用的是較舊的瀏覽器版本。若要獲得最佳 MSN 體驗,請使用支援的版本

【頭條獨家】惡死老竇 森美躁底子女學足 陳豪嚴管野蠻孻女親自教功課

星島網即時新聞 標誌星島網即時新聞 23/6/2021
阿Mo(右)和森美均自認嚴父,但一個是「鼓勵型」,一個是「躁底型」。 © 由 星島網即時新聞 提供 阿Mo(右)和森美均自認嚴父,但一個是「鼓勵型」,一個是「躁底型」。

所謂「有其父必有其子」,父母就係仔女面鏡,影響真係可以好大。陳豪(阿Mo)和森美最近為真人動畫《比得兔2:走佬日記》粵語版配音,兩位型爸接受《頭條日報》訪問時,大談湊仔經,雖然二人均自認嚴父,但前者是「鼓勵型」,後者則屬「躁底型」。森美大讚阿Mo識得身教,後悔過去自己控制唔到情緒,搞到一對子女似足自己亂發脾氣,好欣賞溫文爾雅的阿Mo育兒有方。不過,阿Mo卻踢爆7歲大仔Aiden好百厭,仲教唆6歲二仔Nathan一齊搗蛋,並坦言已開始嚴管5歲野蠻孻女Camilla!撰文:黎寶倫 攝影:張詠森

  森美和陳豪於真人動畫《比得兔2:走佬日記》中,分別再為「比得」及「賓仔」聲演,故事講述碧雅(露絲拜恩 飾)將比得的頑皮事蹟寫進兒童書,搞到人人當他是百厭星,更常被「爸爸」湯瑪士(當勞格利遜 飾)誤會兼責罵,於是比得決定離家出走!

  對媽咪駁嘴駁舌

  現實中,身為DJ的森美稱兒時並唔曳,功課做遲一個鐘已自覺好百厭,但卻坦承最叻駁嘴。回想小學5年班被媽咪打,當時他竟反駁:「你有咩資格打我呀?你又唔係上帝!」事後見媽咪垂淚幫他捽藥油,森美才知道對方很錫自己,故現時對子女發了脾氣,也會搵機會向他們解釋,「每個家長總有一、兩次控制唔到情緒,但記住話番畀佢聽點解鬧佢,要畀佢知道你錫佢、關心佢。」曾患抑鬱症日日黑面、挑剔人的他,睇到子女長大後有樣學樣,也認為身教十分重要,並讚阿Mo教得小朋友乖巧又快樂。

  大仔撩細佬搞事

  主張鼓勵子女多作嘗試的阿Mo,讓小朋友從錯誤中學習與成長,作為家長也應盡量管理情緒,透過講道理教育下一代,但他直言,若仔女打交便會馬上喝止。三個仔女中誰最百厭?阿Mo爆大仔Aiden似足戲中的「比得」,「佢好聰明、好多主意又會坐唔定,四圍搞事,但開始有『我又衰咗喇』嗰種心態。(帶頭搗亂?)佢咪同細佬講『你咁咁咁』,叫佢去做囉,但細佬好乖、好聽話。」又指二仔Nathan似自己,雖然食飯、做功課慢吞吞,但會自己妥當完成;而孻女Camilla則較野蠻任性,同時也很討人歡心、好嗲兼貪靚。

  督促仔女做功課

  問會否偏心錫住囡囡?阿Mo否認,更稱比教仔更嚴,「佢好細個已經表現到有啲對抗,所以要畀佢知道需抱住認真態度去對待功課、老師,佢嬲我都冇計,你筆劃錯咗,我就擦晒佢,你再寫錯,我擦一百次都係咁,直至你學識為止。」語畢森美抵死笑指,試過將兒子的「核突功課」擦晒,豈料大懵沒告訴囝囝,仲要怪對方欠交功課,結果囝囝楚楚可憐向他解釋:「我做咗㗎!但返到去一打開成版功課冇咗。」森美續笑道:「當時我唔岀聲,叫佢寫番好,仲話佢『你返學唔Check吓功課先岀門口㗎咩?』哈哈!」

image beaconimage beaconimage beacon